နေပြည်တော် မေ ၁၄
ကချင်ပြည်နယ် ပူတာအိုခရိုင်အတွင်း နယ်စပ်ရေးရာ ဝန်ကြီးဌာနမှ တာဝန်ယူဆောင်ရွက်နေသော မဂွေဇ-ခေါင်လန်ဖူးလမ်း (၆၅/၄)မိုင် ဖောက်လုပ်ခြင်းလုပ်ငန်းများ ဆောလျင်စွာ ပြီးစီးနိုင်ရေးအတွက် မေခမြစ်အရှေ့ဘက်ခြမ်း လမ်းဖောက်လုပ်ရေးလုပ်ငန်းများကို ယခုနှစ်မိုးရာသီကာလ အတွင်း လုပ်ငန်းရပ်နားခြင်းမပြုဘဲ နယ်စပ်ရေးရာဝန်ကြီး ဌာန၏ ကြီးကြပ်မှုဖြင့် ဦးစီးဌာနရုံးချုပ်မှ အင်ဂျင်နီယာ မှူးကြီး ဦးခင်မောင်လတ်နှင့် ပူတာအိုခရိုင် ဖွံ့ဖြိုးမှုကြီးကြပ် ရေးရုံးတို့၏ အနီးကပ်ကြီးကြပ်မှုဖြင့် ဝန်ကြီးဌာနဝန်ထမ်း များ၊ တပ်မတော်သားများနှင့် ဒေသခံပြည်သူများ ပူးပေါင်း၍ ကြိုးပမ်းဆောင်ရွက်လျက်ရှိကြောင်း သိရ သည်။
မဂွေဇ-ခေါင်လန်ဖူးလမ်းဖောက်လုပ်ရေးလုပ်ငန်း သည် ၂၀၁၇-၂၀၁၈ ဘဏ္ဍာရေးနှစ်တွင် စတင်ခဲ့ရာ ၂၀၂၀ ပြည့်နှစ် မတ်လအတွင်း မဂွေဇမှ (၄၃/၃)မိုင် ကွာဝေးသည့် မေခမြစ်သို့ရောက်ရှိခဲ့ပြီး လမ်းဖောက်လုပ်ရေးလုပ်ငန်းခွင် သုံး ယန္တရားများကို မေခမြစ်အရှေ့ဘက်ကမ်းသို့ ပို့ဆောင်၍ လမ်းဖောက်လုပ်ရေးလုပ်ငန်းအား ဆက်လက်ဆောင်ရွက် လျက်ရှိသဖြင့် ယခင်ဒေသခံပြည်သူများ ခြေလျင်ခရီး ဖြင့် ၁၂၊ ၁၃ ရက်ကြာခက်ခဲစွာ သွားလာခဲ့ရသော လမ်းကြောင်းကို ယခုအခါတွင် ဆိုင်ကယ်ဖြင့် ပူတာအိုမြို့မှ ခေါင်လန်ဖူးမြို့အထိ ၁၂၅ မိုင် ၄ ဖာလုံ ခရီးအား နေ့ချင်း ပေါက် စီးနင်းသွားလာလျက်ရှိပြီး ခရီးသည်တင် မော်တော်ယာဉ်လိုင်းများအနေဖြင့်လည်း မေခမြစ်ကမ်း ရီဒမ်းကြိုးတံတားအထိ (၁၀၃/၃)မိုင်ကို နေ့ချင်းပေါက် ပို့ဆောင်လျက်ရှိသည်။
နယ်စပ်ရေးရာဝန်ကြီးဌာနအနေဖြင့် ၂၀၁၇-၂၀၁၈ ဘဏ္ဍာရေးနှစ်မှစတင်၍ ဘဏ္ဍာရေးနှစ်အလိုက် အကောင် အထည်ဖော်ဆောင်ရွက်ခဲ့ရာ မဂွေဇ-ခေါင်လန်ဖူးလမ်း (၆၅/၄)မိုင်အနက် ယခု ဘဏ္ဍာနှစ်ကုန်တွင် မြေလမ်း (၅၁/၀)မိုင်၊ ကျောက်လမ်း (၃၄/၀)မိုင်၊ ဆိုင်ကယ်လမ်း (၁၂/၀)မိုင်နှင့် လမ်းကြောင်းတစ်လျှောက်လိုအပ်သော တံတား ကြီး/ငယ်/လတ် ၂၃ စင်း၊ Box Culvert ၁၆၅ စင်း၊ ကျောက်စီရေမြောင်း ၁၄၁၉၅ ပေ ထည့်သွင်းတည်ဆောက် ပြီးစီးမည်ဖြစ်ပြီး အဆိုပါလမ်းပိုင်းတွင် လိုအပ်သော ကဆန်ခချောင်းကူးတံတားနှင့် မေခမြစ်ကူးတံတားများကိုလည်း ဆောက်လုပ်ရေးဝန်ကြီးဌာန အစီအစဉ်ဖြင့် တည်ဆောက်သွားမည်ဖြစ်ရာ ယခုဘဏ္ဍာနှစ်မှစတင်၍ အကြိုအင်ဂျင်နီယာလုပ်ငန်းများ ဆောင်ရွက်လျက်ရှိ သည်။
ခေါင်လန်ဖူးဒေသသည် ယခင်က လမ်းပန်းဆက်သွယ် ရေးခက်ခဲမှုကြောင့် လူမှုစီးပွားဘဝများ နိမ့်ပါးလျက်ရှိရာ ယခုလမ်းဖောက်လုပ်ပေးခြင်းကြောင့် ဒေသတွင်းလူမှုစီးပွား ဘဝများ အဆင်ပြေချောမွေ့လာပြီး ကုန်စည်စီးဆင်းမှု ချောမွေ့လာစေမည်ဖြစ်သဖြင့် ဒေသခံတိုင်းရင်းသားများ ဝမ်းသာကျေနပ်လျက်ရှိကြောင်း သိရသည်။
သတင်းစဉ်