ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင် စစ်ကိုင်းတိုင်းဒေသကြီးအတွင်းရှိ လူ့စွမ်းအားအရင်းအမြစ်ဖွံ့ဖြိုးရေးသင်တန်းကျောင်းများနှင့် ချင်းပြည်နယ်အတွင်းရှိ ဒေသဖွံ့ဖြိုးရေးလုပ်ငန်းများ ကွင်းဆင်းစစ်ဆေးခြင်း

နေပြည်တော်၊ ဒီဇင်ဘာလ  ၂၄  ရက်
     စစ်ကိုင်းတိုင်းဒေသကြီး၊ ကလေးမြို့သို့ ရောက်ရှိနေသော ပြည်ထောင်စုဝန်ကြီး ဒုတိယ ဗိုလ်ချုပ်ကြီးရဲအောင်သည် ချင်းပြည်နယ်အစိုးရအဖွဲ့ဝင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးဟန်ဝင်းအောင်နှင့် တာဝန်ရှိသူများ လိုက်ပါလျှက် ဒီဇင်ဘာလ (၂၄)ရက်နေ့ နံနက်ပိုင်းတွင် ကလေးမြို့၊ အမျိုးသမီး အိမ်တွင်းမှု အသက်မွေးလုပ်ငန်း ပညာသင်တန်းကျောင်းသို့ ရောက်ရှိရာ ကျောင်းအုပ်မှ သင်တန်းကျောင်းဆိုင်ရာ ကိစ္စရပ်များအား တင်ပြချက်အပေါ် ပြည်ထောင်စုဝန်ကြီး က လိုအပ်ချက်များ ဖြည့်ဆည်းဆောင်ရွက်ပေးခဲ့ပြီး အဆင့်မြင့် စက်ချုပ် သင်တန်း နှင့် အခြေခံအိမ်တွင်းမှု သင်တန်းတက်ရောက်နေသော သင်တန်းသူများ၏ သင်တန်း ချုပ်လုပ်နေမှုများအား ကြည့်ရှု့အားပေး၍ သင်တန်းသူအိပ်ဆောင်နှင့် စားရိပ်သာတို့အား လှည့်လည် ကြည့်ရှု့ စစ်ဆေးခဲ့သည်။
     ဆက်လက်၍ ပြည်ထောင်စုဝန်ကြီးနှင့်အဖွဲ့သည် နယ်စပ်ဒေသတိုင်းရင်းသားလူငယ်များ၏ လူ့စွမ်းအားအရင်းအမြစ်ဖွံ့ဖြိုးတိုးတက်စေရန် ပြုစုလေ့ကျင့် သင်ကြားပေးလျှက်ရှိသော ကလေးမြို့၊ နယ်စပ်ဒေသတိုင်းရင်းသားလူငယ်များ ဖွံ့ဖြိုးရေး သင်တန်းကျောင်းသို့ ရောက်ရှိခဲ့ပြီး ကျောင်းအုပ်ကြီးမှ သင်တန်းကျောင်းဆိုင်ရာ ကိစ္စရပ်များနှင့် စပ်လျဉ်း၍  တင်ပြမှုအပေါ် ပြည်ထောင်စုဝန်ကြီးမှ ဖြည့်ဆည်းပေးခဲ့ပြီး ကျောင်းအုပ်ကြီး၊ နည်းပြဆရာ/ ဆရာမများနှင့် သင်တန်းသား/သူများ၏ အဓိက ရည်မှန်းချက် ဖြစ်သည့် ဒေသ၊ ပြည်နယ်၊ နိုင်ငံတော်အတွက် အားကိုးအားထားပြုရမည့်သူများဖြစ်စေရန်၊ စည်းကမ်းနှင့် အချိန်ကိုတန်ဖိုးထားတတ်စေရန်၊ ပေါင်းသင်းဆက်ဆံရေး ကောင်းမွန်စေရန်၊ ကျန်းမာသန်စွမ်း ဖြတ်လတ်အောင် ပြုမူနေထိုင် စေရေးတို့အပြင် ဘဝ၏တိုးတက်မှု၊ ရင့်ကျက်မှု၊ အတွေးအမြင်ကျယ်ပြန့်စွာ သိရှိနားလည် ဆုံးဖြတ်နိုင်စွမ်းရှိစေရေးအတွက် မဖြစ်မနေ စာဖတ်ခြင်း အလေ့အကျင့်ကောင်းများကို လေ့ကျင့်ကြိုးစား ကျင့်ကြံကြရန် နှင့် ပြုစုပျိုးထောင်ပေးကြရန် မှာကြားခဲ့ပြီး ကျောင်းသား/သူ အိမ်ဆောင်များ၊ စားရိပ်သာများ ကြည့်ရှု့စစ်ဆေးခဲ့ပြီး ကျောင်းသား/သူများနှင့်အတူ နေ့လည်စာ အတူစားသုံးခဲ့သည်။
     ထို့နောက် ပြည်ထောင်စုဝန်ကြီးနှင့်အဖွဲ့သည် နယ်စပ်ရေးရာဝန်ကြီးဌာန၊ နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေးဦးစီးဌာနနှင့် ပြည်နယ်အစိုးရတို့ ပူးပေါင်းဖောက်လုပ် ပေးခဲ့သော ခိုင်ကမ်း- ပိန်းပိ- တွီးစောက်-ဒေါ်လွင် မြေသားလမ်း (၂၈/၀)မိုင်အနက် (၂/၀)မိုင် ကွန်ကရစ်လမ်းခင်းခြင်း လုပ်ငန်းခွင်သို့ ရောက်ရှိပြီး လုပ်ငန်းဆောင်ရွက်နေမှုများအား ကြည့်ရှု့စစ်ဆေးခဲ့သည်။
     အဆိုပါလမ်းသည် ကလေးမြို့မှ ခိုင်ကမ်း- ပိန်းပိ- တွီးစောက်-ဒေါ်လွင် ကျေးရွာတို့ကို ဖြတ်၍ တီးတိန်မြို့သို့ ဆက်သွယ်ပေးမည့် လမ်းကြောင်းဖြစ်ပြီး ယခင် လမ်းဟောင်းထက် မိုင်(၂၀/၀)ခန့် လျော့နည်းပြီး အချိန်သက်သာစွာ သွားလာနိုင်မည့် လမ်းကြောင်းဖြစ်ကြောင်း သတင်းရရှိပါသည်။