ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင်၊ ရှမ်းပြည်နယ်(တောင်ပိုင်း) နှင့် ပအိုဝ်း ကိုယ်ပိုင်အုပ်ချုပ်ခွင့်ရဒေသအတွင်းရှိ နယ်စပ်ဒေသဖွံ့ဖြိုးရေးလုပ်ငန်းများ ကြည့်ရှုစစ်ဆေး

နေပြည်တော်၊ နိုဝင်ဘာ ၁၆
    နယ်စပ်ရေးရာဝန်ကြီးဌာန၊ ပြည်ထောင်စုဝန်ကြီး ဒုတိယဗိုလ်ချုပ်ကြီးရဲအောင်သည် ရှမ်းပြည် နယ်အစိုးရအဖွဲ့ဝင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီးလှဦး၊ လမ်းပန်းဆက်သွယ်ရေး ဝန်ကြီး ဦးခွန်ရဲသွေး၊ အရှေ့ပိုင်းတိုင်းစစ်ဌာနချုပ်၊ ဒုတိယတိုင်းမှူး ဗိုလ်မှူးချုပ်ဝင်းဇော်မိုး၊ ဌာနဆိုင်ရာများမှ တာဝန်ရှိသူများလိုက်ပါလျှက် ရှမ်းပြည်နယ်(တောင်ပိုင်း) နှင့် ပအိုဝ်းကိုယ်ပိုင် အုပ်ချုပ်ခွင့်ရဒေသအတွင်းရှိ နယ်စပ်ဒေသဖွံ့ဖြိုးရေးလုပ်ငန်းများကို ကြည့်ရှုစစ်ဆေးခဲ့ရာ (၁၄-၁၁-၂၀၁၈) ရက်နေ့ နံနက်ပိုင်းတွင် ရပ်စောက် မြို့နယ်၊ ကျောက်ဂူ-နောင်ဝိုးလမ်းသို့ရောက်ရှိခဲ့ပြီး ၂၀၁၇-၂၀၁၈ ခု ဘဏ္ဍာရေးနှစ် ရန်ပုံငွေဖြင့် ဆောင်ရွက်ခဲ့သော ကတ္တရာလမ်း(၅/၀)မိုင် ဖောက်လုပ်ခြင်း၊ ကျောက်လမ်း(၁၅/၀)မိုင် ပြုပြင်ထိန်းသိမ်းခြင်းနှင့် ၂၀၁၈-၂၀၁၉ ဘဏ္ဍာနှစ် ပထမ(၆)လ ရန်ပုံငွေဖြင့် ဆောင်ရွက်ပြီးစီးသည့် (၂၅)ပေ ကွန်ကရစ်တံတား(၂)စင်း၊ (၈)ပေ  Box Culvert (၃)စင်း တည်ဆောက်ပြီးစီးမှု အခြေအနေများကို ကြည့်ရှုစစ်ဆေး၍ တာဝန်ရှိသူ များ၏ တင်ပြချက်များအပေါ် ပြည်ထောင်စုဝန်ကြီးက လိုအပ်သည်များအား ညှိနှိုင်းပေါင်းစပ် ဖြည့်ဆည်း ဆောင်ရွက်ပေးခဲ့သည်။
    ဆက်လက်၍ ပြည်ထောင်စုဝန်ကြီးနှင့်အဖွဲ့သည် ညဉ့်စဉ်-ပန်ဝပ်-ကုန်းဆာ မြေသားလမ်းသို့ သွားရောက်ပြီး ၂၀၁၈-၂၀၁၉ ဘဏ္ဍာရေးနှစ် ပထမ(၆)လတွင် ဆောင်ရွက်ခဲ့သော ကျောက်ချော လမ်း (၂/၀)မိုင် ပြီးစီးမှုနှင့် ၂၀၁၈-၂၀၁၉ ဘဏ္ဍာနှစ်တွင် ဆောင်ရွက်နေသော ကျောက်ချောလမ်း (၃/၀) မိုင်ကို ကြည့်ရှုစစ်ဆေးကာ သတ်မှတ်ကာလပြီးစီးရေး၊  ရေနုတ်မြောင်းများနှင့် လမ်းပုခုံးများကို ရေစီးရေလာကောင်းရန်အတွက် စနစ်တကျဆောင်ရွက်သွားရန် မှာကြားခဲ့သည်။ ယခုဖောက်လုပ်နေသော နောင်ဝိုး-ညဉ့်စဉ်-ကုန်းဆာ-နမ့်လန်လမ်းပြီးစီးပါက ရှမ်းပြည်နယ် (တောင်ပိုင်း) အင်တော၊ ကျောက်ဂူဒေသမှ ရှမ်းပြည်နယ်(မြောက်ပိုင်း) သီပေါ၊ လားရှိုးသို့ အချိန်တိုအတွင်း ကူးလူးသွားလာနိုင်မည် ဖြစ်ပါသည်။
    ပြည်ထောင်စုဝန်ကြီးနှင့်အဖွဲ့သည် နေ့လည်ပိုင်းတွင် ရပ်စောက်မြို့နယ် ကျောက်ဂူ-ထမင်းပေါင်း-ကျောက်မီးခတ်-မရင်းကုန်းလမ်း လုပ်ငန်းခွင်သို့ သွားရောက်ခဲ့ပြီး ၂၀၁၈-၂၀၁၉ ဘဏ္ဍာနှစ် ပထမ(၆)လတွင် ဆောင်ရွက်ပြီးစီးခဲ့သည့် ကျောက်ချောလမ်း (၃/၀)မိုင်၊ ၂၀၁၈-၂၀၁၉ ဘဏ္ဍာရေးနှစ် ရန်ပုံငွေဖြင့် ဆောင်ရွက်မည့် ကျောက်လမ်း(၂/၀)မိုင် လုပ်ငန်းခွင်များကို ကြည့်ရှုစစ်ဆေး၍ လိုအပ်သည်များ ညှိနှိုင်းပေါင်းစပ်ဆောင်ရွက်ပေးခဲ့သည်။
အလားတူ ပြည်ထောင်စုဝန်ကြီးသည် (၁၅-၁၁-၂၀၁၈) ရက်နေ့တွင် ရှမ်းပြည်နယ် (တောင်ပိုင်း)၊ တောင်ကြီးမြို့နယ်အတွင်း၌ ၂၀၁၆-၂၀၁၇ ဘဏ္ဍာနှစ်ရန်ပုံငွေဖြင့် ဖောက်လုပ်ပြီးစီး ခဲ့သည့် တောင်ကြီး-ပန်းတင်-ဖက်ကွန်-လင်းလေ-ဇလဲ ကတ္တရာလမ်း(၄/၀) မိုင်နှင့် ပအိုဝ်းကိုယ်ပိုင် အုပ်ချုပ်ခွင့်ရဒေသ ဟိုပုံးမြို့နယ်အတွင်း ၂၀၁၈-၂၀၁၉ ဘဏ္ဍာနှစ် ပထမ(၆)လ ရန်ပုံငွေဖြင့် ဆောင်ရွက်ပြီးစီးခဲ့သည့် နမ့်ပေါ်ဟွန်း-ပါပန့်-သက်သာ-ပုံချောင်း မြေလမ်း(၃/၀)မိုင် လုပ်ငန်းခွင် များသို့ ရောက်ရှိခဲ့ပြီး လမ်းလုပ်ငန်းဆောင်ရွက်ထားရှိမှု အခြေအနေများကို ကြည့်ရှုစစ်ဆေး၍ လိုအပ်သည်များ ပေါင်းစပ်ညှိနှိုင်းပေးခဲ့ကြောင်း သတင်းရရှိသည်။

 

Post Paragraph