နယ်စပ်ရေးရာဝန်ကြီးဌာန နယ်စပ်ဒေသနှင့်တိုင်းရင်းသားလူမျိုးများ ဖွံ့ဖြိုးတိုးတက်ရေးဦးစီးဌာနသည် နယ်စပ်ဒေသများ လမ်းပန်းဆက်သွယ်ရေး ကောင်းမွန်စေရေးအတွက် စဉ်ဆက်မပြတ် ကြိုးပမ်းဆောင်ရွက်ပေးလျက်ရှိရာ ကယားပြည်နယ်၊ လွိုင်ကော်မြို့နယ်အတွင်း ၂၀၂၂-၂၀၂၃ ဘဏ္ဍာရေးနှစ် နယ်စပ်ဒေသဖွံ့ဖြိုးရေး (ပြည်ထောင်စု) ရန်ပုံငွေကျပ် ၂၅၀ ဒသမ ၇၁၅ သန်းဖြင့် မထောခူ ကျေးရွာအုပ်စု၊ လွိုင်ကော်-ရှားတောလမ်းမကြီးမှ ဝမ့်ကွန်-လောလာလိ-မထောခူ ၃ မိုင် ၆ ဒသမ ၆၄မိုင် အနက် အဆင့်မြင့်တင်ရန် ကျန်ရှိသည့် ၁ မိုင် ၂ ဖာလုံအား ကတ္တရာလမ်း အပြီးသတ်ခင်းခြင်းနှင့် ၎င်းလမ်းပေါ်တွင် လမ်းရေရှည် ခိုင်ခန့်စေရန်အတွက် Box Culvert ၅ စင်း ထည့်သွင်း ဆောင်ရွက်ပေးလျက်ရှိရာ သတ်မှတ် ဘဏ္ဍာရေးနှစ်အတွင်း လုပ်ငန်းအားလုံး ၁၀၀% ဆောင်ရွက်ပြီးစီးခဲ့ကြောင်း သိရှိရပါသည်။
အဆိုပါ လမ်းအသုံးပြုသည့် ပြည်သူလူထုများ ယာဉ်အန္တရာယ်မှ ကာကွယ်နိုင်ရန် လမ်းညွှန်းများ၊ လမ်းအမှတ်အသားများ၊ အချက်ပြများကိုလည်း ထည့်သွင်းဆောင်ရွက်ပေးထားကြောင်း သိရှိရပါသည်။
ကျေးရွာချင်းဆက်လမ်း ဆောင်ရွက်ပေးခြင်းဖြင့် ကျေးရွာ ၁၀ ရွာ၊ အိမ်ခြေ ၁၉၁၄အိမ်နှင့် လူဦးရေ ၁၀၁၉၃ ဦး အကျိုးပြုမှုရှိပြီး ကျေးလက်နေပြည်သူများ၏ အလုပ်အကိုင်အခွင့်အလမ်းများ တိုးတက်မှုရရှိ၍ လူမှုစီးပွားဘဝ ဖွံ့ဖြိုးတိုးတက်လာမည် ဖြစ်ပါကြောင်း သိရပါသည်။
