နေပြည်တော် စက်တင်ဘာ ၇
ပဋိပက္ခအတွင်း လိင်ပိုင်းဆိုင်ရာအကြမ်းဖက်မှု တားဆီးကာကွယ်ရေးနှင့် တုံ့ပြန်ဆောင်ရွက်ရေး ဆိုင်ရာအမျိုးသားအဆင့် ကော်မတီအစည်းအဝေး (၃/၂၀၂၃)ကို ယနေ့ မွန်းလွဲ ၂ နာရီတွင် နေပြည်တော်ရှိ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာ ချထားရေးဝန်ကြီးဌာန စုပေါင်းအစည်းအဝေးခန်းမ၌ ကျင်းပသည်။
အစည်းအဝေးသို့ ပဋိပက္ခအတွင်း လိင်ပိုင်းဆိုင်ရာ အကြမ်းဖက်မှုတားဆီးကာကွယ်ရေးနှင့် တုံ့ပြန်ဆောင်ရွက်ရေးဆိုင်ရာ အမျိုးသားအဆင့်ကော်မတီဥက္ကဋ္ဌ၊ လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြည်ထောင်စုဝန်ကြီး ဒေါက်တာစိုးဝင်း၊ ဒုတိယဥက္ကဋ္ဌများ၊ အဖွဲ့ဝင်များ၊ အမြဲတမ်းအတွင်းဝန်များ၊ ညွှန်ကြားရေးမှူးချုပ်များ၊ မြန်မာနိုင်ငံအမျိုးသမီးရေးရာ အဖွဲ့ချုပ်ဥက္ကဋ္ဌနှင့် တာဝန်ရှိသူများ တက်ရောက်ကြသည်။
အစည်းအဝေးတွင် ပြည်ထောင်စုဝန်ကြီးဒေါက်တာစိုးဝင်းက ပဋိပက္ခအတွင်း လိင်ပိုင်းဆိုင်ရာ အကြမ်းဖက်မှုတားဆီးကာကွယ်ရေးနှင့် တုံ့ပြန်ဆောင်ရွက်ရေးဆိုင်ရာအမျိုးသားအဆင့် လုပ်ငန်းစီမံချက် ဒုတိယသက်တမ်းကို ၂၀၂၂ ခုနှစ် နိုဝင်ဘာ ၁၀ ရက်မှ စတင်အကောင်အထည်ဖော် ဆောင်ရွက်နေပြီ ဖြစ်ပါကြောင်း၊ ဒုတိယသက်တမ်းကာလအတွင်း စီမံချက်လုပ်ငန်းစဉ်များကို ဒေသအဆင့်အမျိုးသမီး ကော်မတီ၏ လုပ်ငန်းတာဝန်များတွင် ထည့်သွင်းဆောင်ရွက်နိုင်ရေး သက်ဆိုင်ရာအမျိုးသမီးကော်မတီ ဥက္ကဋ္ဌများထံသို့ အကြောင်းကြားပြီးဖြစ်ပါကြောင်း၊ ပြည်ထောင်စုနယ်မြေနေပြည်တော်၊ တိုင်းဒေသကြီး/ ပြည်နယ်များတွင် အမျိုးသားအဆင့် လုပ်ငန်းစီမံချက်နှင့်စပ်လျဉ်းသည့် အသိပညာပေးမှုများကို ဆောင်ရွက်နေပါကြောင်း၊ ပဋိပက္ခနှင့်စပ်လျဉ်းသော လိင်အကြမ်းဖက်မှုဆိုင်ရာ ကုလသမဂ္ဂ အတွင်းရေးမှူးချုပ်၏ ၂၀၂၂ ခုနှစ်၊ အစီရင်ခံစာတွင် မြန်မာနိုင်ငံနှင့်စပ်လျဉ်း၍ ဖော်ပြချက်များအပေါ် အမျိုးသားအဆင့်ကော်မတီက ယခုနှစ်ဇူလိုင် ၂၅ ရက်တွင် တုံ့ပြန်ချက်ထုတ်ပြန်ခြင်း၊ အမျိုးသားအဆင့် လုပ်ငန်းစီမံချက် အကောင်အထည်ဖော်ဆောင်ရွက်မှုများကို ပြည်သူများလွယ်လင့်တကူ လက်လှမ်းမီ သိရှိရေး အမျိုးသားအဆင့်လုပ်ငန်းစီမံချက် အသိပညာပေးလက်ကမ်းစာစောင်ပြုစုထားရှိပြီး ဖြန့်ဝေရေး စီစဉ်လျက်ရှိပါကြောင်းနှင့် ပထမခြောက်လပတ်အစီရင်ခံစာကို ရေးသားပြုစုလျက်ရှိပါကြောင်း၊ ယခု အစည်းအဝေးတွင် အမျိုးသားအဆင့်လုပ်ငန်းစီမံချက် ဒုတိယသက်တမ်း၏ ပထမ(၆)လပတ် အစီရင်ခံစာ အတည်ပြုရေးနှင့် အမျိုးသားအဆင့် လုပ်ငန်းစီမံချက် တတိယ အကြိမ်သက်တမ်းတိုးရေးကိစ္စများကို ဆွေးနွေးပေးစေလိုကြောင်း ပြောကြားသည်။
ဆက်လက်၍ ပဋိပက္ခအတွင်းလိင်ပိုင်းဆိုင်ရာ အကြမ်းဖက်မှုတားဆီးကာကွယ်ရေးနှင့် တုံ့ပြန် ဆောင်ရွက်ရေးဆိုင်ရာ အမျိုးသားအဆင့် ကော်မတီအတွင်းရေးမှူး၊ လူမှုဝန်ထမ်းဦးစီးဌာန ညွှန်ကြားရေးမှူးချုပ်က ပြီးခဲ့သည့်အစည်းအဝေး အမှတ်စဉ် (၂/၂၀၂၃) ၏ ဆုံးဖြတ်ချက်များအပေါ် ဆောင်ရွက်ခဲ့မှုများ၊ လုပ်ငန်းကော်မတီအစည်းအဝေး (၂/၂၀၂၃) ၏ ဆုံးဖြတ်များအပေါ် အကောင်အထည်ဖော် ဆောင်ရွက်မှုများ၊ အမျိုးသားအဆင့်လုပ်ငန်းစီမံချက် (၂၀၂၂-၂၀၂၃) အကောင်အထည်ဖော်မှုအပေါ် သုံးသပ်ချက်များကို တင်ပြဆွေးနွေးသည်။
ထို့နောက် တက်ရောက်လာသူများက ပထမ(၆)လပတ် အစီရင်ခံစာ(မူကြမ်း)အပေါ် အကြံပြု ဆွေးနွေးအတည်ပြုခြင်းနှင့် စီမံချက်ကာလတတိယ သက်တမ်းတိုးရေးတို့ကို ဆွေးနွေးခဲ့ကြပြီး ပြည်ထောင်စုဝန်ကြီးက နိဂုံးချုပ်အမှာစကား ပြောကြားခဲ့ကြောင်း သိရသည်။
သတင်းစဉ်
